如何投身银行网络保安?

小森阿四專欄

2017年10月20日

如何投身银行网络保安?


阿四:
小森,有读者问我哋,点先可以投身做银行网络安全嘅工作呀?

小森:
金融业愈来愈重视网络安全,呢方面嘅人才全世界都争住请!做得网络安全,除咗一般会要求从业员有资讯科技相关嘅学位或工作经验外,好多雇主仲会睇下系咪有国际级嘅网络安全专业认证。

阿四:
我知道,香港普遍都接受其他公认嘅国际资历认证。金管局旧年推出网络防卫计划,其中一个重点系培训更多网络安全嘅香港专才,于是联同香港银行学会、应科院推出本地化嘅网络安全专业认证「CCASP」。考试唔止系笔试,部分仲要喺电脑度模拟网络受黑客攻击情况,考验考生嘅临场应对能力,听讲要求都唔低㗎。所以银行学会有提供课程,畀考生做好准备。

小森:
除咗CCASP,我知道银行学会明年会喺银行专业资历架构下,推出一个新嘅网络安全培训课程及专业认证项目,畀银行业嘅网络安全从业员由浅入深咁去学习。

阿四:
呢行咁火热,我真系好有兴趣。但我唔系读IT出身,仲有无计?

小森:
其实,唔少大学都有举办金融科技短期课程,畀修读任何科目嘅大学生深造。话说回来,金融科技涉及金融、科技、法律、工程等唔同领域,呢啲科目嘅毕业生可能会占优,但听讲唔少金融科技公司请人时,唔一定只睇「沙纸」,仲会睇下应征者够唔够创意。

阿四:
目前为此,香港已经有两家本地大学开办咗金融科技学位㖭。

小森:
仲有金管局举办嘅金融科技人才培育计划(FCAS),为大学生提供银行实习职位,等佢哋有实战经验,为将来入行热身。下年年初再开始报名,记得留意啦!



想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年10月20日