金管局招聘MT

小森阿四專欄

2017年09月29日

金管局招聘MT

小森:
金管局又开始请MT(见习经理)啦!

阿四:
听闻去年超过2,000人申请,结果6位成功入职。其实系咪要专攻金融嘅申请人至有机?

小森:
根据过去经验,申请人当中修读经济、金融、商科嘅同学较多,但我哋都有请其他课程嘅同学。金管局希望觅得「通才」做MT,培育佢哋做未来管理骨干。申请人只要系大学毕业生,工作经验不拘,最重要系思考同分析能力强、对数字敏感、语文同沟通能力好,当然最重要系对公共政策同服务社会有热诚,具团队合作精神。而且,MT需要轮流喺唔同部门工作,讲求学习同适应能力。

阿四:
报考MT要过几多关?

小森:
申请人递交表格时,要交一篇三百字短文,睇下佢哋对呢份工嘅诚意同埋文字水平。获选中嘅申请人,就要进行小组讨论、笔试、仲有起码两轮面试。

阿四:
问题会唔会好刁钻?

小森:
都几考综合能力㗎,主要睇下考生有几了解金管局嘅工作,同埋对国际本地时事、同公众关心课题有乜见解。面试时最紧要有自己嘅睇法,切忌背书!

阿四:
MT成功获聘就会开始两年嘅在职培训,轮流喺两至三个部门工作,涉足同银行监管、联系汇率、外汇基金、金融科技、风险管理等相关工作。中间仲加插唔少课堂培训。完成后就晋升做经理。

小森:
仲有一份「笋工」,就系金管局嘅见习经济师。招聘对象系以修读经济或金融相关学科嘅硕士生或博士生为主,见习经济师会喺两至三个不同部门负责经济研究或宏观金融状况嘅监察工作。培训完成后,就晋升做经济师!

阿四:
讲咁耐,未讲两份工作待遇系点。

小森:
两份工作月薪都系由四万蚊起,仲有以工作表现挂鈎嘅浮动薪酬,亦有完善嘅福利制度,唔差㗎。

阿四:
几时截止报名?

小森:
MT计划10月21日就截止,见习经济师就12月31日截止,有兴趣可以扫瞄QR code了解详情同埋MT过来人经验分享!


金管局见习经理计划QR Code
金管局见习经理计划QR Code

时间表


想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年09月29日