- 阿四：
- 噚日美国联储局宣布十月启动「缩表」。其实乜嘢系缩表？
- 小森：
- 系缩联储局嘅资产负债表。好多央行都系「无中生有」咁创造货币，即系俗称「印银纸」。钱多咗，央行嘅资产负债表就会增大。2008年金融危机，事后美国采取量化宽松货币政策刺激经济，就系联储局印咗好多银纸，买入大量美国国库债券同按揭抵押证券 (MBS) ，令到资产负债表由约八千亿美元膨涨到而家差不多四万五千亿美元，向市场注入大量流动资金。债券到期后，就将收返嘅本金再买债。呢种非常手段扭曲咗环球金融市场嘅平衡，引致唔少不良后果，美国近年经济转好，系时候正常化，缩表系方法之一。
- 阿四：
- 资产负债表可以点缩？
- 小森：
- 就系当储联局手上债券到期后，唔再续期，收返本金并同时注销等额嘅货币，于是资产负债表就缩细。对市场来説，效果等同将资金由市场抽走。
- 阿四：
- 过去几年，全世界资产价格系咁升，多少都系由于多国央行大印银纸去支撑。美国缩表，仲话加息㖭，咁啲资金咪会由海外市场流返去美国，钱少咗，各地资产价格咪会调整？咁咪香港都会有影响罗！
- 小森：
- 系有机会㗎，但你都知环球政治、经济形势咁复杂，加上美国缩表又系史无前例。究竟美国货币政策正常化后，全球资产价格会几快调整、调整几多、几耐、点样调整，都好多未知之数。
- 阿四：
- 所以大家都系审慎管理风险为上啦！
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
