Jackson Hole之旅

小森阿四專欄

2017年09月08日

Jackson Hole之旅

阿四:
陈总,你上个月去咗Jackson Hole央行年会喎!其实Jackson Hole喺边㗎?

陈德霖:
Jackson Hole系美国西部一个山谷,位于怀俄明州(Wyoming)大堤顿国家公园(Grand Tenton National Park)。由香港出发去都几转折,连埋等机转机嘅时间,差唔多要廿几个钟。

阿四:
点解拣个咁「隔涉」地方开会?

陈德霖:
Jackson Hole央行年会系由堪萨斯城(Kansas City)联邦储备银行举办,今年已经第三十六年。拣Jackson Hole呢个风景如画嘅钓鱼胜地开会,有传系为咗吸引时任美国联储局主席同其他人士出席,自此美联储主席发表开幕演讲成为年会嘅不成文传统。

阿四:
央行行长最少两三个月喺瑞士巴塞尔(Basel)见一次,Jackson Hole央行年会有乜特别?

陈德霖:
央行行长好多时都会借喺呢个年会演说时透露未来政策。例如二○一○年时任美联储主席伯南克讲到,要振兴经济有好多政策,第二轮买债系选项之一。讲完呢番话后三个月,美国就真系启动咗QE2。又好似欧洲央行行长德拉吉喺二○一四年讲到欧洲持续低通胀的风险,第二年欧央行就开始量宽。何况Jackson Hole年会亦会邀请著名经济学家同教授出席发表论文同讨论,系国际经济同金融界少有嘅高层次会议。

阿四:
所以如果要捕捉可能影响全球金融经济走势嘅蛛丝马迹,就要儫实呢个年会!

陈德霖:
Jackson Hole年会系一个比较非正式场合,除咗讨论世界经济同金融市场嘅新趋势,又可以互相「收风」。我今次见到其他央行行长,包括美联储局主席耶伦同欧洲、德国、日本央行行长,都有同佢哋交流同讨论。

阿四:
听同事讲,你今次都做咗好多准备功夫。

陈德霖:
系呀,主办方邀请我喺大会总结小组发言,主题讨论量宽政策可能加剧收入同财富分配不均嘅现象。有兴趣嘅话,可以去「汇思」睇下我讲嘅重点

阿四:
陈总,点解你影啲相咁闷?只得会场嘅相,无喺Jackson Hole景点selfie嘅?

陈德霖:
Selfie都要睇场合㗎,留返下次放假去再影啦。

喺台上准备发言
图片说明:喺台上准备发言(陈德霖摄)

会议休息中
图片说明:会议休息中(陈德霖摄)

由无数鹿角砌成嘅拱门
图片说明:由无数鹿角砌成嘅拱门,Jackson Hole景点之一──不过喺网上照片,陈总专注开会,无暇打咭。


想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年09月08日