银行职位点止sales咁单一

小森阿四專欄

2017年09月01日

银行职位点止sales咁单一

阿四:
早几日我同母校啲师弟师妹倾偈,发现佢哋以为喺银行返工只系坐柜位、做sales跑数,未必啱自己性格;有啲又以为只有读商科先可以入行,似乎对从事银行工作有唔少误解。

小森:
佢哋可能唔知道,银行职位好似踢足球咁,分为前锋、中场同后卫。平日我哋比较多接触系前线嘅银行职员,主要负责面向客户、销售同交易、业务拓展等。至于中场嘅员工就系支援前线职员、负责风险管理同合规(Compliance)工作等。

阿四:
后勤职员嘅工种同银行业关系无咁大,例如资讯科技、人事部、财务部等,呢啲职位喺其他公司都会有。仲有新兴嘅金融科技,更加无分「前中后」,最紧要员工有「桥」。

小森:
近年有两大工种喺银行界好吃香,就系合规同金融科技。前者系为银行把关,确保营运符合各种监管嘅要求,后者就唔使多解释啦。

阿四:
金融业系香港经济一大产业,占GDP大约18%。全港有25万人从事金融业,当中银行占超过10万人。银行本身都分好多种,除咗最常见到嘅零售银行,仲有专做企业客户嘅商业银行、投资银行,或者针对高资产客户嘅私人银行等。

小森:
所以银行点止得销售工作咁单一!

阿四:
而且银行业行头大、工种多,可以有机会作唔同尝试!


                           银行工种分类

银行工种分类 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年09月01日