总裁天水围之行

小森阿四專欄

2017年08月18日

总裁天水围之行

阿四:
陈总,你噚日去咗天水围北参观几间新开嘅银行分行喎。点解嘅?

陈德霖:
我成日讲普及金融,其中一样就系鼓励银行改善分行覆盖,为市民提供基本银行服务,履行银行嘅社会责任。经过一段时间嘅协调,今年应该会有大约十间实体分行开张。我噚日去天水围北参观嘅三间分行,其中有两间都系喺暑假刚开张,另一间营业咗差唔多八个月。

阿四:
三间够唔够㗎?

陈德霖:
其实年几前,已经有两间发钞银行嘅流动分行先后进驻呢区。而呢三间分行亦进一步可以为附近七个公共屋邨、两个居屋屋苑嘅居民提供服务。听返几间银行嘅职员讲,街坊反应都唔错。例如开业无耐嘅分行已经开咗唔少新户口。原来呢几间银行职员都住喺附近,返工都好方便。

阿四:
我知道另外两间银行嘅设计都几特别,其中一间放咗两部传统柜员机再加一部视像柜员机。只要一拎起视像柜员机嘅电话,就可以同银行职员视像对话,解答疑难。就算唔识用呢部机都唔怕,因为现场有银行职员教路,仲系周一至周六开到夜晚七点,打工仔收工都用到。佢哋嘅柜员机可以打埋簿㗎,而另一个特色就系就算唔记得提款卡,都可以小额提款!

陈德霖:
我哋经常鼓励银行善用金融科技,呢个正系成功嘅例子。另一间银行设计落足心思,将其中一个柜位嘅高度调低,方便返使用轮椅嘅人士。呢啲小小改动,对提升普及金融有大大帮助!

阿四:
头先你话今年会有十间实体分行开张,点解得十间咁少?

陈德霖:
呢十间都系讲紧喺一啲比较偏远地区同公共屋邨开㗎。银行开实体分行有好多考虑,除咗成本效益之外,你都知香港地搵铺位唔系话咁易。况且大势所趋,银行愈来愈数码化同利用金融科技,透过实体分行使用服务嘅比例可能会愈来愈少。

阿四:
我知道金管局推动紧唔少普及金融嘅工作,陈总裁记得喺度同大家分享!

金管局总裁陈德霖参观天水围北区三间新开嘅银行,其中一间调低咗柜位高位,方便轮椅使用者。
金管局总裁陈德霖参观天水围北区三间新开嘅银行,其中一间调低咗柜位高位,方便轮椅使用者。


想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年08月18日