- 阿四：
- 小森，你上次同我讲嘅按揭证券公司年金计划，估唔到咁快就有公布！
- 小森：
- 系呀，按揭证券公司嘅同事一直有就安老产品花心思去做研究，佢哋参考咗香港同海外市场现时年金产品嘅条款，准备过程中亦不停同持份者取经、摸底、听意见。
- 阿四：
- 最重要系呢个计划简单易明，特点系终身保证、即时提取，填补咗而家市场嘅空隙。每个人投保上限系100万蚊，以每年内部回报4厘、65岁开始投保，估计男投保人每个月收5,800蚊，女投保人就收5,300蚊嘛。咁简单，我都识得同爸爸妈妈介绍返。
- 小森：
- 简单嘅数字背后做咗好多功夫㗎。年金嘅计算方法比较复杂，而且涉及年期非常长，又有好多唔同嘅假设，按揭证券公司嘅精算师需要针对唔同假设嘅众多可能性进行模拟分析，务求计到一个老友记觉得吸引嘅回报水平，而按揭证券公司又有持续充足嘅财力去执行。话晒按揭证券公司都系由公帑注资成立，所以都要好审慎管理风险。模拟分析都好花时间，修改一个数都要重新计过全盘数目，往往用几个钟头，甚至成晚开住部电脑计。
- 阿四：
- 除咗有精算师负责计算年金回报，金管局同按揭证券公司亦有唔少同事参与产品设计。佢哋虽然对年金嘅认识比唔上精算师，但就可以从投保人嘅角度考虑产品嘅细则，听闻有同事表现得好投入，当正自己系退休人士咁去谂，保证年金产品够「贴地」。
- 小森：
- 咁又系，呢个系面向公众嘅投资产品，谂嘅时候除咗计数，仲要多啲切身处地从用家心理去度跷，尽量人性化都非常重要。而毕竟今次系金管局同按揭证券公司第一次推出年金产品，就算系拥有丰富财金经验嘅同事，都要补补课。而家听佢哋讲年金，都几有专家feel㗎。
- 阿四：
- 我知道按揭证券公司好严谨，下一步会搵独立专业人士睇睇年金产品系咪持续可行，先至会推出市场。
- 小森：
- 系喎，上次你讲到同世伯伯母建议参加安老按揭计划。如果佢哋同时参加安老按揭计划，以平均每个月攞15,000蚊计，再加埋年金计划嘅话，每个月就有一笔唔错嘅固定收入。
- 阿四：
- 不过我都会提醒返佢哋，无论逆按揭、年金，或者市面上其他安老产品都各有优点，最重要系清楚了解自己需要同产品特质，精明配置资金呀！
- 小森：
- 我一直都好羡慕我啲退休公务员世伯有长俸收，第时我都可以用年金计划自制长俸，唔使咁「葡萄」！
- 阿四：
- 我有个好孝顺嘅朋友仲话送份年金畀家中长辈㖭呀！到底年金产品几时开始发售？
- 小森：
- 按揭证券公司正着手研究计划嘅细则，预计最快下年年中推出。睇到市民初步对产品嘅反应唔错，令我哋更有动力做到最好。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
