- 阿四：
- 你放假去咗边度玩？
- 小森：
- 星期六我去咗北区探我婆婆，顺便教佢用视像柜员机。
- 阿四：
- 点解要教佢用嘅？
- 小森：
- 你都知去银行好多时都要排队，佢老人家脚力唔好，企多阵会攰。其实视像柜员机提供嘅服务都几全面，啱佢用。
- 阿四：
- 你婆婆平时用唔用柜员机？
- 小森：
- 少用。老人家始终对机器抗拒啲，而且佢钟意同真人倾偈，好多时情愿落返分行排队。
- 阿四：
- 视像柜员机有镜头畀银行职员同客户视像对话，客户就算唔识用，职员都可以即时教佢。
- 小森：
- 好似我婆婆咁，上星期六想将港元定期存款续期，平时佢要行多几步去分行处理。今次我教佢用楼下新装嘅视像柜员机，佢只需要插入银行咭，然后按银行职员指示将身份证放去扫瞄器，再喺轻触式萤幕上面签名，银行职员核对到佢嘅身份后，好快帮佢办理手续，密码都唔使揿。婆婆仲顺便问埋人民币定存嘅息口㖭！佢用完猛咁赞个职员嘅态度。
- 阿四：
- 我知道部分银行嘅视像柜员机系二十四小时运作，而有啲银行就派职员喺视像柜员机隔离，即场教客户点用。全香港有几多部视像柜员机？
- 小森：
- 现时有五间银行提供超过二百部机，比一年前多咗一倍几。全港自动柜员机都超过三千三百部，比十年前增加咗四成咁多。
- 阿四：
- 有啲人觉得香港嘅银行覆盖不足，其实随住科技发展，网上银行、手机应用程式、视像柜员机都处理到银行嘅基本服务，市民未必经常要去分行㗎。其实大约只有三成嘅金融交易仲系经银行柜位处理㗎咋。
- 小森：
- 金管局陈总成日讲普及金融，意思就系市民大众，包括偏远地区嘅居民、老人家，或者唔惯用电脑嘅基层市民，都可以获得基本嘅银行服务。普及金融点帮到市民，我哋下次再讲多啲。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
