- 阿四：
- 听讲呢排多咗人专程上嚟金管局资讯中心，要买我哋上星期喺度讲过含有十三万八千蚊嘅纸镇呀！
- 小森：
- 估唔到我哋都有啲叫座力喎。讲开又讲，我近日又无意中发现咗公司有条神秘管道呀！
- 阿四：
- 喺边度？有乜用？
- 小森：
- 呢条管道贯穿两层楼，但唔系畀人行，而系用嚟传送一啲金融交易结算嘅文件。
- 阿四：
- 嗄，仲咁落后？今时今日乜都电子化啦，传送文件用内部电脑揿个掣咪搞掂罗。
- 小森：
- 当然我哋绝大部分都用电子网络搞掂，但有啲要有正式实物文本做依据，仲要喺短时间经多个相关同事签名核实。咪睇佢传统，呢个方法其实非常可靠㗎。比起「人肉」速递，跑上跑落好得多！
- 阿四：
- 仲肯定可以免遭黑客入侵㖭！
- 小森：
- 黑客？冇咁易。金管局做足网络安全，但亦不时举行演习。好似早排有个礼拜六我哋就模拟万一金管局IT系统瘫痪，无法支援写字楼各部门嘅运作，同事仍要确保喺呢种极端情况下，金管局嘅关键功能可以持续运作，包括金融交易嘅交收结算。
- 阿四：
- 无电脑用，咁咪要飞纸仔？
- 小森：
- 效率当然受影响，但最重要系我哋透过呢啲演习，确保金管局面对突发事件时，都可以维持主要功能唔会停顿，否则会影响香港嘅金融市场。
- 阿四：
- 讲返条神秘管道，其实点用？
- 小森：
- 同事将文件卷入去特定胶筒，再放入神秘管道（见图），一揿制，管道变成真空状态，胶筒就会好似子弹咁飞上或飞落去目的地，既安全，又快捷。
- 阿四：
- 咁咪好嘈罗？
- 小森：
- 少少㗎，所以管道四周要铺隔音棉。
- 阿四：
- 其实讲咗咁耐，究竟神秘管道喺边两层楼？
- 小森：
- 唔话你知。
- 阿四：
- 点解喎？
- 小森：
- 咁先够神秘！
只要将文件卷入特定胶筒（红箭嘴示），放入神秘管道，胶筒就如子弹般飞弹到目的地。
想问多啲有关金管局工作嘅题目，欢迎电邮到小森、阿四专用邮箱：88hkma@hkma.gov.hk
