點解要銀行審慎貸款?

小森阿四專欄

2018年11月23日

點解要銀行審慎貸款?

阿四:
近排資產市場下跌,中美又爆貿易戰,加上有零星內地企業借貸違約嘅新聞,會唔會影響到香港銀行體系㗎?

 

小森:
唔使咁擔心,金管局一向關注銀行有冇用審慎原則批核貸款,包括有冇足夠資料了解借款人嘅背景、還款能力、現金流,以及借款用途等。另外,金管局亦會睇實銀行呆壞帳嘅情況,有需要時會要求妥善處理,例如追收、撥備或者沖銷,唔會容許呆壞帳累積。呢啲審慎批核貸款嘅原則適用於所有銀行貸款㗎。

 

阿四:
咁香港銀行向內地企業貸款嘅情況係點?

 

小森:
今年六月底止,內地相關貸款大約佔香港整體貸款約45%,同往年都差唔多。我知負責銀行監理嘅同事都睇到實,雖然曾經出現個別內地企業債務違約,但未有擴散跡象。事實上,今年上半年香港零售銀行嘅不良貸款比例係0.53%,全球主要銀行體系中屬極低嘅水平。

 

阿四:
金管局要繼續關心銀行信貸質素,畢竟銀行貸款出去嘅資金,絕大部分來自市民嘅畢生積蓄。如果銀行亂咁借錢收唔返而倒閉,會連累到好多無辜嘅存戶血本無歸。外圍經濟咁多不明朗因素,銀行監理部嘅同事真係面對幾大挑戰,不過佢哋一定會繼續努力,做好保護存戶嘅工作。

 

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年11月23日