- 阿四：
- 美國早排又加息！有啲人話美國再加息，就會觸發香港出現資金大舉外流，影響金融穩定，係咪咁得人驚？
- 小森：
- 香港係國際嘅金融同商貿中心，資金成日自由出入㗎啦！最重要嘅係銀行有冇妥善管理好流動性風險。
- 阿四：
- 乜嘢係流動性風險？點解流動性咁重要？
- 小森：
- 流動性係隨時可以動用嘅資金，包括可以快速變現嘅流動資產。銀行流動性愈高，抵禦資金外流嘅能力就愈強。
- 阿四：
- 我明白，就好似我有層樓喺手，即使呢層樓價錢幾高都好，如果急起嚟變賣唔到，都係等如無錢用。咁金管局有乜方法確保銀行妥善管理流動性風險？
- 小森：
- 金管局要求銀行按自身嘅業務性質，制定合適而審慎嘅流動性風險管理系統，通過現場同非現場審查，評估銀行流動性風險管理嘅成效。我哋會定期對銀行進行流動性壓力測試，評估銀行以至整個銀行體系係咪能夠應付資金喺短時間內大規模流走嘅風險。你放心啦，香港銀行嘅流動性相當充裕，以第1類機構（包括大部分零售銀行）為例，2018年第二季平均流動性覆蓋比率超過150%，高於法定最低要求嘅90%水平，顯示香港銀行業應付資金流走嘅能力相當強！
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
|
題：銀行體系流動性覆蓋比率遠高法定要求
|
|
|
