- 阿四：
- 陳總喺早幾日最佳金融科技獎頒獎禮透露金管局開始研究數碼貨幣，又話數碼貨幣係用分布式分類帳技術（Distributed Ledger Technology，DLT），究竟係乜嚟？
- 小森：
- DLT係一種記帳技術，當中又以Blockchain區塊鏈最多人留意，特點係將數據複製畀各參與者，並合組成為細塊，經各方驗證用家身份同數據真實無誤後，再以加密鏈將細塊串連，鎖死數據唔能夠更改，最後儲存喺各方嘅數據庫入面。一般來說，就算數據出錯都唔可以刪走，只能加入新數據修補。任何紀錄一經區塊鏈技術留低，就永遠留底。
- 阿四：
- 剛才你講每個字我都識，但串埋一齊就唔明。
- 小森：
- 試下用個比喻。話說有日你同三個朋友打麻將，想搵人幫手記數，但又信唔過其他人。於是你哋各自一本電子數簿，每打完一鋪牌，贏嗰個就記數，資料會自動複製到其他人嘅數簿。打完幾圈，數簿記滿一頁之後，大家各自攞出嚟對數，核實咗呢頁嘅紀錄無問題後，電子數簿會自動將各人目前總輸贏嘅銀碼記喺下一頁頁頂，再由呢頁開始記錄下一圈之後嘅數，如此類推。
- 阿四：
- 當打完牌計數時發現有本簿唔啱數，即係有人做咗手腳啦？
- 小森：
- 呢種方法做手腳唔容易，如果有人偷偷改動其中一本數簿嘅一個數字，全頁嘅紀錄就對唔到下一頁頁頂嘅總輸贏銀碼。
- 阿四：
- 有無可能改晒四本簿？
- 小森：
- 除非有齊四個人同意先改到。打麻將只係比喻，喺真實應用時，區塊鏈嘅「數簿」可以多達幾十又或上百本，儲喺唔同地方、由唔同人保存，要全部竄改都幾難。
- 阿四：
- 區塊鏈可以點應用喺金融業？
- 小森：
- 有銀行已經使用區塊鏈技術去改善按揭嘅流程，由估值公司直接將估值資料輸入喺一本同銀行共用嘅簿。呢種做法可以確保估值資料喺傳輸過程中無被竄改，同埋減少人手出錯嘅機會。另外亦有銀行研究緊利用區塊鏈解決貿易融資上嘅問題。
- 阿四：
- 原來區塊鏈可以咁應用！香港喺金融科技方面，其實都應用得好快喎。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
圖片說明：金管局總裁陳德霖周一喺「最佳金融科技獎」頒獎禮透露金管局正研究數碼貨幣
