- 小森：
- 阿四，世伯有冇參加到香港年金計劃呀？
- 阿四：
- 無呀。佢覺得買終身年金等如鎖住啲錢，擔心日後有乜頭暈身㷫，唔夠錢應急。
- 小森：
- 香港年金計劃啱啱推出優化版本喎！投保嘅「老友記」可以申請「特別款項提取」，用嚟支付喺香港嘅醫療，包埋牙科嘅費用。最高可提取金額係已繳保費嘅一半，或已繳保費扣除已派發累積年金之後嘅金額，以較低者為準，而提取金額上限係30萬元及只可以提取一次。不過注意返，提取後，每月年金金額就會按比例減少咗。
- 阿四：
- 仲有一點令我爸爸猶豫，就係萬一佢未攞足保證金額就同大家講拜拜，後人想一筆過攞返年金嘅保證期數，需要打折扣，佢覺得好蝕底。
- 小森：
- 優化版香港年金計劃提供「百分百一筆過身故賠償」，後人可以即時一筆過收取全數已繳保費（扣除已派發嘅累積保證年月年金金額），世伯可以安心投保啦！
- 阿四：
- 有啲老友記覺得，計劃嘅投保上限100萬元，每月攞嘅錢唔係幾見使喎。
- 小森：
- 投保上限已經提高到200萬元啦！換言之，65歲投保200萬元嘅男士同女士，分別可以收到每月$11,600同$10,600。
- 阿四：
- 咁要等幾耐先有下一輪香港年金計劃發售？
- 小森：
- 唔使等！香港年金計劃改用全年持續銷售模式，有興趣嘅老友記可以先打去2512-5000或喺年金公司網站（www.hkmca.hk）預約，然後親身到上環或荔枝角嘅銷售處辦理投保手續。
- 阿四：
- 咁認購咗香港年金計劃嘅老友記，係咪一樣受惠上述嘅優化措施㗎？
- 小森：
- 無錯！假如佢哋想加大投保額，再去辦理新保單就搞掂！
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
