銀行擠提的日子

小森阿四專欄

2018年12月07日

銀行擠提的日子

阿四:
金管局工作之一係維持銀行體系穩定,確保市民存款嘅安全。究竟香港曾經出現過幾多次銀行擠提?

 

小森:
香港喺六十同八十年代都出現較大規模嘅擠提。先講六十年代,1965年市場傳出「明德銀號」資金緊絀,因而引發擠提,幾日後就倒閉,仲波及多間華資銀行先後被擠提,即使當時呢啲銀行本身無營運問題,但亦難以承受大量存戶同時提款,其中一間大型華資銀行更喺呢次擠提潮中,需要向同業出售控股權。

 

阿四:
八十年代嘅擠提潮又係點嘅呢?

 

小森:
八十年代有好幾間銀行出現擠提,原因不盡相同,但總括嚟講,當時陷入財困嘅恒隆銀行、海外信託銀行同佢嘅子公司香港工商銀行,最後都由政府接管,並且需要動用外匯基金注資,以維持呢啲銀行嘅日常運作,減低對市民嘅影響。整個八十年代,外匯基金總共動用咗90億港元拯救出事嘅銀行。而九七年亞洲金融危機時,外匯基金亦有向一間擠提嘅銀行提供280億元債務擔保。

 

阿四:
如果唔係外匯基金有足夠彈藥,為香港金融穩定提供最後防線嘅話,後果不堪設想。

 

小森:
無錯,但2008年全球金融危機時,各地政府動用天文數字嘅公帑拯救「大得不能倒」金融機構,呢種「佢請客,我埋單」嘅做法受盡各界非議。國際間於是制定咗「處置機制」,避免再用巨額公帑幫經營不善金融機構填氹,中央銀行嘅最後貸款人角色亦有所轉變。

 

阿四:
我哋之前都介紹過「處置機制」,其中一樣措施就係要銀行做定準備,將來出事時,由銀行股東同埋債權人承擔返倒閉嘅虧損。

 

小森:
香港銀行都審慎經營,資本非常充足,大家又唔使過慮!

 

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年12月07日