- 阿四：
- 金管局每次公布調整基本利率時，都會提到「貼現窗」，究竟呢隻係乜嘢窗？
- 小森：
- 貼現窗係一隻金管局為銀行提供短期流動資金嘅窗口。簡單嚟講，銀行喺日終結算時，假如發現流動資金唔係咁足夠嘅話，可以每日下午五點半至六點半通過呢個窗，將持有嘅外匯基金票據或債券做抵押，向金管局借取隔夜港元流動資金嚟進行銀行同業結算。
- 阿四：
- 銀行向其他銀行借就得啦，點解要向金管局借呢？
- 小森：
- 係㗎，一般情況下銀行都會透過同業之間嘅拆借解決資金需要，不過有時個別銀行一時之間未必能夠喺同業之間完全借得晒所需要嘅資金都唔出奇，貼現窗可以畀銀行多一個途徑借入隔夜資金。
- 阿四：
- 咁貼現窗利息又點計？
- 小森：
- 銀行經貼現窗向金管局借錢，金管局向銀行收取嘅利率就叫做「貼現率」，係用「基本利率」計算。「基本利率」係根據一條公開透明嘅公式計出嚟，就係按「美國聯邦基金利率」目標區間下限加50點子，或者隔夜同1個月香港銀行同業拆息5天移動平均數嘅平均值，以較高者為準。就好似最近一次，美聯儲喺9月加息25點子，金管局就宣布上調「基本利率」25點子至2.50厘。
- 阿四：
- 哦，原來是咁的，我明啦。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
