企業財資中心(CTC)

小森阿四專欄

2018年10月19日

企業財資中心(CTC)

阿四:
聽同事講,話金管局積極推動企業嚟香港開設CTC,係乜東東嚟㗎?

 

小森:
CTC係企業財資中心(corporate treasury centre)嘅英文縮寫,好多跨國公司都設有內部CTC,集中管理全球各地分支同關聯公司嘅資金、融資、外匯兌換、投資同對沖等財資活動,用嚟提升公司整體財務、運作效益同管理風險。

 

阿四:
咁咪好似我哋將錢畀媽媽做「家用」,由佢集中管理全家嘅生活開支點樣使,例如幾時去超市入貨、幾時去「唱」外幣旅行用,等「家用」見使啲?

 

小森:
CTC嘅工作唔止「格價」慳錢,仲發揮資金池嘅作用,睇住集團內各公司嘅資金,互相調配以提升集團整體資金嘅使用效率。例如A分支公司有閒錢,打算放喺銀行賺些微嘅存款利息,而另一方面B分支公司唔夠錢,準備向銀行借貸,兩間公司未必知道對方嘅資金狀況,但CTC就可以通盤睇晒,將A公司嘅閒資借畀B公司,A公司就可以收到比存款利息高嘅回報,而B公司付出比銀行借貸低嘅利息。就好似媽媽知你等錢使,與其你向外人借錢捱貴利息,佢就喺家用呢個資金池借畀你。

 

阿四:
香港係國際金融中心,有世界級嘅股票同債券市場、全球最大離岸人民幣中心,加上我哋嘅司法同稅務制度完善,好適合跨國企業嚟開設CTC喎!但點解推廣CTC又關金管局事?

 

小森:
因為金管局其中一項主要職能係維持同提升香港國際金融中心嘅地位。其實唔少跨國企業將CTC同地區總部設置喺同一個地方,所以一旦揀咗嚟香港設立CTC嘅話,好大機會都將地區總部搬過嚟,為香港金融同周邊行業帶嚟更多就業機會,促進經濟發展。

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年10月19日