來自HKMA的你

小森阿四專欄

2018年08月24日

來自HKMA的你

小森:
阿四,你今日個樣唔同咗嘅?

 

阿四:
噓,細聲啲。我換咗個look準備喬裝成銀行顧客去幫金管局進行「喬裝顧客檢查計劃」,了解銀行喺提供產品同服務時嘅手法。

 

小森:
金管局由2010年推出呢個計劃,希望以客戶第一身體驗了解銀行嘅營運手法。每次抽查嘅範疇都有唔同,例如開銀行戶口、銷售投資產品同保險產品。呢個計劃嘅喬裝顧客都係受過培訓,唔係你換個look就做得。佢哋要識得問啱問題、畀合適嘅反應、記低銀行職員講過乜,仲要小心保持神秘身份,好講技巧㗎。喬裝完後仲要填寫問卷,方便整理同分析資料。

 

阿四:
咁搵乜人做喬裝顧客?

 

小森:
乜人都有!為咗令抽查結果更有廣泛代表性,喬裝顧客會來自唔同年齡層、種族、教育背景同財政狀況等。

 

阿四:
「喬裝顧客檢查計劃」做完有乜用?

 

小森:
金管局之前做嘅「喬裝顧客檢查計劃」,發現個別銀行同職員嘅投資同保險產品銷售手法仍有改善嘅空間,於是我哋就要求有關銀行採取適當嘅跟進措施,包括加強相關管控和員工培訓。我哋仲將抽查結果同銀行業界分享,提醒返佢哋要遵從適用嘅監管規定同預期標準。我哋亦會根據檢查計劃嘅結果,同埋我哋喺監管過程中所發現嘅其他情況,向銀行發出相關嘅指引㖭。

 

 

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年08月24日