點止得藝術嘅巴塞爾

小森阿四專欄

2018年06月22日

點止得藝術嘅巴塞爾

 

阿四:
小森,同事飛去巴塞爾(Basel)開會喎,每年Art Basel就話吸引好多人去「朝聖」,但點解金管局成日都要去個度開會?

 

小森:
巴塞爾係瑞士第三大城市,係金融同文化重鎮嚟㗎!國際結算銀行(Bank for International Settlements)嘅總部就設喺巴塞爾,十國組織(G-10)喺1974年成立咗「巴塞爾銀行監理委員會」(巴塞爾委員會),都會定期喺國際結算銀行開會,負責制定指引同金融監管標準,係「央行」嘅「央行」。金管局分別喺1996年同2009年加入國際結算銀行同埋巴塞爾委員會,係佢哋嘅成員。

 

阿四:
另外,二十國集團(G-20)喺2009年成立嘅「金融穩定理事會」(FSB)嘅秘書處亦設於國際結算銀行。

 

小森:
金管局陳總被委任擔任FSB轄下監督合作常設委員會(SRC)嘅主席㖭,2年任期由舊年4月開始。SRC制定與金融穩定相關嘅監管政策,促進監管機構就跨轄區監管問題合作。金融穩定理事會邀請陳總領導SRC嘅工作,反映咗香港健全嘅銀行體系廣受認可,亦體現香港作為國際金融中心對全球金融穩定嘅貢獻。

 

阿四:
唔怪得金管局陳總同同事不時都要飛去巴塞爾,原來有咁多國際金融組織會議要開。

 

小森:
唔係去「開個會、吹吓水」咁簡單㗎,而係真喺有好多實質嘢做。喺銀行監管方面,金管局會同其他監管機構一齊制定一啲國際監管標準。好似金融海嘯之後制訂嘅《巴塞爾協定三》咁,要經過多年嘅討論先至喺「資本充足率、壓力測試、流動性風險」各方面達成協議。有咗國際標準,金管局仲有好多後續嘅立法工作,確保香港同國際接軌,鞏固國際金融中心嘅地位同競爭力。

 

金管局同事經常飛去巴塞爾嘅國際結算銀行總部開會(圖片來源:國際結算銀行)
金管局同事經常飛去巴塞爾嘅國際結算銀行總部開會(圖片來源:國際結算銀行)

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年06月22日