- 阿四：
- 小森，你好、沙嘩啲卡、Namaste！
- 小森：
- 做乜無啦啦講外語？
- 阿四：
- 乜你唔知金管局網頁新增咗一個為居港少數族裔而設嘅資訊專頁，分別用七種居港少數族裔嘅常用語文，包括印尼文、印度文、尼泊爾文、泰文、他加祿文、烏爾都文同埋旁遮普文，提供一啲實用嘅銀行服務資訊畀佢哋參考。
- 小森：
- 好貼心喎。呢個資訊專頁有乜睇㗎？
- 阿四：
- 好實用㗎，例如有開戶嘅一般資訊、使用自動櫃員機嘅保安提示、存款保障計劃，仲有由銀行公會提供關於認識不動賬戶同穩健理財嘅小冊子。我哋亦上載咗《公平待客約章》同埋《銀行營運守則》嘅一般原則。呢個新設嘅資訊專頁能幫助少數族裔人士在使用銀行服務時，更清楚了解自己嘅權利同責任。
- 小森：
- 呢個資訊專頁可以幫到幾多人？
- 阿四：
- 應該幫到唔少㗎，根據政府統計處嘅中期人口報告，二○一六年香港非華人嘅人口大約有五十八萬（包括外籍家庭傭工約三十二萬人），佔居港人口比例約百分之八。呢五十八萬非華人之中，印尼、印度、尼泊爾、泰國、菲律賓及巴基斯坦裔合共佔超過七成。
- 小森：
- 金管局陳總裁成日講普及金融，意思就係市民大眾可以獲得基本嘅銀行服務，當然包括埋少數族裔啦。
- 阿四：
- 係㗎，金管局都好關注少數族裔使用銀行服務時，係咪獲得公平對待。好似幾年前曾經向銀行發出通告，提醒佢哋要遵守促進平等機會嘅相關條例，喺提供服務時，乜嘢家庭狀況（例如單親）、性傾向、年齡或種族，都要一視同仁㗎！
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
