又到拜年時

小森阿四專欄

2018年02月23日

又到拜年時


阿四:
小森,舊年「人日」我哋開始寫呢個專欄,眨下眼就一年嘞!

小森:
多得讀者支持,呢一年我哋收到唔少讀者有趣嘅問題,有啲仲變成呢個專欄嘅題目㖭!例如點樣入行做網絡保安、香港喺人民幣國際化有乜貢獻、舊鈔票去咗邊等等。

阿四:
有啲問題直頭好「經濟學」㖭!好似聯繫匯率點樣運作。最多人關心嘅題目係「就業」,我哋每次介紹完實習計劃後,都會收到唔少讀者查詢。

小森:
其實我哋兩個又邊識咁多嘢吖,好彩有金管局各同事幫忙,先可以解答讀者疑難,同埋每星期都搵到有趣味嘅題目!

阿四:
連陳總裁都幫埋一份㗎!好似舊年去Jackson Hole參加央行年會,特登影相畀我哋寫文章用!

小森:
唯一憾事係同事經常叫錯我名,叫咗做「阿三」、「小三」!

阿四:
我仲慘,係「小四」㖭呀…

小森:
總好過叫「不三不四」!我哋專欄呢一年介紹過唔少金管局工作,當中有啲發展唔錯㗎,就好似舊年我哋講派電子利是,今年儲值支付工具嘅服務更全面,連街市、搭的士、寺廟添香油、年宵攤位亦接受電子錢包支付。

阿四:
我哋今年會有更多同市民生活息息相關嘅新工作,陸續同大家報告,記得留意啦。

小森:
最後我哋代金管局同仁,恭祝各位讀者狗年大吉、笑口常開!





想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2018年02月23日