金融科技chat一chat

小森阿四專欄

2017年12月08日

金融科技chat一chat

阿四:
我啱啱撞到Brian同Nelson,話趕住去chatroom(聊天室)。乜金管局有間咁嘅吹水房?

小森:
你就吹水!佢哋講緊專為銀行同科技公司而設嘅金融科技監管聊天室。呢個係金融科技監管沙盒2.0嘅新增功能,投入運作唔夠一星期,已經有銀行同科技公司分別嚟同我哋同事見咗面攞監管意見。

阿四:
又幾快手喎。其實金管局已經有沙盒畀金融科技產品喺小範圍做測試,點解仲增設聊天室?

小森:
一般嚟講,金融科技產品去到較成熟階段,先會喺沙盒進行測試。至於一啲仍然處於構思或研發初期階段嘅創新項目,就可以透過聊天室同我哋傾傾,初步了解有乜監管議題需要注意。萬一有唔妥,可以及早調整修改,甚至諗其他方案,咁就行少啲冤枉路啦。金管局亦會因應項目嘅業務性質,例如有冇涉及網上理財、有冇提供網上貸款等,再安排相關部門同事提供意見。有去過聊天室嘅銀行表示,呢啲意見對銀行準備測試,同埋之後推出嘅金融科技項目好有用,例如幫助提升客戶體驗,令項目推出時既能滿足到相關嘅監管要求,又更能迎合到客戶嘅需要。

阿四:
唔怪得負責監管銀行科技風險嘅Brian、同埋金融科技總監Nelson嘅同事都有份去管理聊天室啦。邊啲公司可以用呢個聊天室?

小森:
任何銀行同科技公司,尤其提供同銀行服務有關嘅金融科技產品,都可以申請使用。

阿四:
如果係銀行服務再加其他金融服務,例如證券、保險等嘅跨界別產品,又用唔用得呢?

小森:
一樣歡迎嚟搵我哋傾下先,如果有啲範圍係金管局畀唔到意見,我哋會轉介企業到證監會或保監局嘅沙盒。

阿四:
點樣申請使用聊天室?

小森:
企業可以將查詢問題電郵到聊天室專用郵箱:chatroom@hkma.gov.hk,我哋盡可能喺七個工作天内回覆。另外,想同我哋視像會議或面談,就要喺每個月嘅1號同15號開始用電郵預約,會議名額先到先得。記得先填妥表格,等我哋了解項目性質,以便作出合適安排。

阿四:
想知多啲沙盒2.0同聊天室詳情,可掃瞄以下二維碼或瀏覧http://bit.ly/2Anutlu

金融科技監管聊天室QR code金融科技監管聊天室QR code

有Fintech問題?搵金管局科技及流動性風險監理處主管李偉文(Brian)(左)同金融科技總監周文正(Nelson)(右)聊聊吧。
圖片說明:有Fintech問題?搵金管局科技及流動性風險監理處主管李偉文(Brian)(左)同金融科技總監周文正(Nelson)(右)聊聊吧。

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2017年12月08日