香港電子支付好落後?

小森阿四專欄

2017年11月17日

香港電子支付好落後?


阿四:
香港電子支付真係落後!內地消費好多已經用手機畀錢,乞兒都識用QR code討錢啦。

小森:
香港廿年前就已經有唔同電子支付選擇喎。信用卡、扣帳卡、八達通等,好多地方都用到。香港人最識揀,大額消費就碌信用卡儲積分,想快個陣就用八達通。你講嘅手機支付,不論本地、內地或海外嘅主流電子錢包,而家喺香港一樣用到,又點算落後。

阿四:
呢排個個都話要「無現金」,香港唔應該跟咩?

小森:
平時偶有商戶唔收毫子、金牛,大家都好大反應,如果「無現金」極端到所有商戶唔收現金,對市民嚟講實在好唔方便。瑞典「無現金化」到連銀行都唔接受現金提存,要當地央行研究有冇需要強制提供現金服務㖭。

阿四:
但內地搭的、街市買餸已經用手機支付,又似乎好方便噃。

小森:
你想像一下,如果香港只係收本港電子支付工具,港紙都唔收,每年訪港嘅幾千萬遊客點算?

阿四:
你又啱。電子支付又好、現金又好,最重要係消費者有得揀,先至算方便。

小森:
所以,金管局希望促進香港發展一個多元、方便、安全嘅電子支付生態,同時兼容現金支付。

阿四:
話時話,香港人要有內地銀行戶口同手機號碼,先可以喺內地用到手機錢包,幾時先可以簡單啲,香港電子錢包直接喺內地支付?

小森:
金管局一班同事正係好努力同支付營運商傾緊,畀啲耐性等等啦。

 

 


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年11月17日