學師準備做私人銀行家

小森阿四專欄

2017年11月10日

學師準備做私人銀行家


阿四:
金管局同私人財富管理公會合辦嘅二○一八年度先導人才培訓計劃開始報名啦!上周六喺金管局舉辦招聘日,吸引約八百五十名同學現場參加。

小森:
咁多人有興趣,同學點先可以突圍而出?

阿四:
我同咗首屆學員Robin傾過,佢嘅面試貼士係對熱門嘅金融題目、金融產品要有基本嘅認識。仲有,唔好單睇銀行個名去申請實習,而係要先了解銀行嘅文化,同自己係咪夾得嚟。

小森:
點知道銀行嘅文化係點?

阿四:
Robin建議,同學可以同返緊心儀銀行嘅師兄師姐傾吓偈,又或者睇吓銀行網站嘅介紹。

小森:
仲有冇其他面試貼士?

阿四:
另一位首屆實習同學Rensi就提醒有意申請計劃嘅同學,唔好只係着眼銀行前線嘅職位,而忽略咗銀行中枱、後勤嘅工作機會。好似Rensi咁,今年暑假就曾經喺銀行存款同埋合規部工作,令佢對私人銀行運作有更全面嘅了解。

小森:
呢個計劃特別之處,係畀同學融入真實嘅工作環境做學徒,近距離向私人銀行家偷師,喺木人巷學真功夫。

阿四:
好似Robin咁,佢實習時唔怕醜同所有同事傾偈學師,連茶水姐姐都有兩招醒佢。

小森:
一般大學生暑假實習職位只係為期一年,呢個計劃兩年嘅暑假咁長,同學要好有決心入行先得喎!

阿四:
無錯,實習同學要喺兩個暑假分別進行八星期嘅在職培訓,如果喺大學二年級暑假開始實習,完成計劃後,就有份私人銀行工作等緊佢哋畢業返工㗎啦。實習期間仲有唔少於一萬蚊嘅月薪㖭!

小森:
本地八間資助大學修讀任何科目嘅學生,都歡迎申請呢個計劃,十一月三十日截止報名,有興趣就快手!

 

私人財富管理先導人才培訓計劃詳情QR code
私人財富管理先導人才培訓計劃詳情QR code

 


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年11月10日