智慧銀行新紀元

小森阿四專欄

2017年10月06日

智慧銀行新紀元

阿四:
陳總,成日聽到人話香港手機支付無內地咁普及,我哋喺金融科技方面要「追落後」!

陳德霖:
金融科技範疇咁廣,手機支付只係其中之一,其他方面如網絡安全都好緊要㗎。即使電子支付,香港發展成熟,港人平均每日碌信用卡170萬次,日均金額有17億,而八達通卡日均更「嘟」1400萬次㗎!

阿四:
你剛公布金管局會推動香港邁向「智慧銀行新紀元」,當中提到明年9月推出「快速支付系統」,市民只需要手機號碼或電郵地址就可以全天候、跨行、即時轉帳港元或人仔,真係前所未有咁方便。

陳德霖:
我哋亦積極同業界商討制定一個共通嘅二維碼(QR code),希望鼓勵更多小商戶使用流動支付。

阿四:
另外,好多人都關心金融科技沙盒升級到2.0。沙盒用嚟畀金融科技產品先喺小範圍做測試,舊年9月推出以嚟,反應好好。

陳德霖:
無錯,已經有9間銀行嘅23個項目曾經或者正在使用沙盒,部分已經推出市場應用,例如指紋識別系統、聊天機械人,為銀行用戶帶嚟新體驗。

阿四:
沙盒升級後新加三大功能,其中一個係聊天室,點解有呢個意念?

陳德霖:
我哋相信,如果創新項目構思初期,銀行同科技公司已經有特定渠道得到監管意見,就會行少啲冤枉路,有助鼓勵金融科技業發展。

阿四:
仲有,沙盒之前只開放畀銀行或者同銀行合作嘅科技公司使用,升級後,科技公司就可以直接透過聊天室,同金管局溝通。

陳德霖:
沙盒2.0仲新增「一點通」切入,協助一啲跨界別嘅項目,按需要接通金管局、證監會同保監局嘅沙盒,唔使再逐間機構拍門。

阿四:
智慧銀行新紀元舉措之一,係引入虛擬銀行。雖然內地同海外都有個別呢啲例子,香港行唔行得通㗎?

陳德霖:
金管局好快會諮詢業界,睇下2000年發出嘅虛擬銀行指引,有冇需要修訂去配合今時今日虛擬銀行嘅發展需要。根據海外經驗,虛擬銀行有助落實普及金融,亦好受個人同中小企業歡迎。

阿四:
嘩,咁多嘢,搞唔搞得掂?

陳德霖:
只要我哋同銀行同科技業界共同努力,冇話唔得嘅!


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年10月06日