Jackson Hole之旅

小森阿四專欄

2017年09月08日

Jackson Hole之旅

阿四:
陳總,你上個月去咗Jackson Hole央行年會喎!其實Jackson Hole喺邊㗎?

陳德霖:
Jackson Hole係美國西部一個山谷,位於懷俄明州(Wyoming)大堤頓國家公園(Grand Tenton National Park)。由香港出發去都幾轉折,連埋等機轉機嘅時間,差唔多要廿幾個鐘。

阿四:
點解揀個咁「隔涉」地方開會?

陳德霖:
Jackson Hole央行年會係由堪薩斯城(Kansas City)聯邦儲備銀行舉辦,今年已經第三十六年。揀Jackson Hole呢個風景如畫嘅釣魚勝地開會,有傳係為咗吸引時任美國聯儲局主席同其他人士出席,自此美聯儲主席發表開幕演講成為年會嘅不成文傳統。

阿四:
央行行長最少兩三個月喺瑞士巴塞爾(Basel)見一次,Jackson Hole央行年會有乜特別?

陳德霖:
央行行長好多時都會借喺呢個年會演說時透露未來政策。例如二○一○年時任美聯儲主席伯南克講到,要振興經濟有好多政策,第二輪買債係選項之一。講完呢番話後三個月,美國就真係啟動咗QE2。又好似歐洲央行行長德拉吉喺二○一四年講到歐洲持續低通脹的風險,第二年歐央行就開始量寬。何況Jackson Hole年會亦會邀請著名經濟學家同教授出席發表論文同討論,係國際經濟同金融界少有嘅高層次會議。

阿四:
所以如果要捕捉可能影響全球金融經濟走勢嘅蛛絲馬跡,就要𥄫實呢個年會!

陳德霖:
Jackson Hole年會係一個比較非正式場合,除咗討論世界經濟同金融市場嘅新趨勢,又可以互相「收風」。我今次見到其他央行行長,包括美聯儲局主席耶倫同歐洲、德國、日本央行行長,都有同佢哋交流同討論。

阿四:
聽同事講,你今次都做咗好多準備功夫。

陳德霖:
係呀,主辦方邀請我喺大會總結小組發言,主題討論量寬政策可能加劇收入同財富分配不均嘅現象。有興趣嘅話,可以去「匯思」睇下我講嘅重點

阿四:
陳總,點解你影啲相咁悶?只得會場嘅相,無喺Jackson Hole景點selfie嘅?

陳德霖:
Selfie都要睇場合㗎,留返下次放假去再影啦。

喺台上準備發言
圖片說明:喺台上準備發言(陳德霖攝)

會議休息中
圖片說明:會議休息中(陳德霖攝)

由無數鹿角砌成嘅拱門
圖片說明:由無數鹿角砌成嘅拱門,Jackson Hole景點之一──不過喺網上照片,陳總專注開會,無暇打咭。


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年09月08日