- 阿四：
- 陳總，你噚日去咗天水圍北參觀幾間新開嘅銀行分行喎。點解嘅？
- 陳德霖：
- 我成日講普及金融，其中一樣就係鼓勵銀行改善分行覆蓋，為市民提供基本銀行服務，履行銀行嘅社會責任。經過一段時間嘅協調，今年應該會有大約十間實體分行開張。我噚日去天水圍北參觀嘅三間分行，其中有兩間都係喺暑假剛開張，另一間營業咗差唔多八個月。
- 阿四：
- 三間夠唔夠㗎？
- 陳德霖：
- 其實年幾前，已經有兩間發鈔銀行嘅流動分行先後進駐呢區。而呢三間分行亦進一步可以為附近七個公共屋邨、兩個居屋屋苑嘅居民提供服務。聽返幾間銀行嘅職員講，街坊反應都唔錯。例如開業無耐嘅分行已經開咗唔少新戶口。原來呢幾間銀行職員都住喺附近，返工都好方便。
- 阿四：
- 我知道另外兩間銀行嘅設計都幾特別，其中一間放咗兩部傳統櫃員機再加一部視像櫃員機。只要一拎起視像櫃員機嘅電話，就可以同銀行職員視像對話，解答疑難。就算唔識用呢部機都唔怕，因為現場有銀行職員教路，仲係周一至周六開到夜晚七點，打工仔收工都用到。佢哋嘅櫃員機可以打埋簿㗎，而另一個特色就係就算唔記得提款卡，都可以小額提款！
- 陳德霖：
- 我哋經常鼓勵銀行善用金融科技，呢個正係成功嘅例子。另一間銀行設計落足心思，將其中一個櫃位嘅高度調低，方便返使用輪椅嘅人士。呢啲小小改動，對提升普及金融有大大幫助！
- 阿四：
- 頭先你話今年會有十間實體分行開張，點解得十間咁少？
- 陳德霖：
- 呢十間都係講緊喺一啲比較偏遠地區同公共屋邨開㗎。銀行開實體分行有好多考慮，除咗成本效益之外，你都知香港地搵舖位唔係話咁易。況且大勢所趨，銀行愈來愈數碼化同利用金融科技，透過實體分行使用服務嘅比例可能會愈來愈少。
- 阿四：
- 我知道金管局推動緊唔少普及金融嘅工作，陳總裁記得喺度同大家分享！
金管局總裁陳德霖參觀天水圍北區三間新開嘅銀行，其中一間調低咗櫃位高位，方便輪椅使用者。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
