金管局變身哈佛教室

小森阿四專欄

2017年08月04日

金管局變身哈佛教室

阿四:
呢幾日我喺公司都見到拎住哈佛大學書包嘅人,佢哋唔係嚟金管局返學呀?

小森:
咁都畀你估到!金管局基建融資促進辦公室(IFFO)夥同哈佛大學肯尼迪政府學院(Harvard Kennedy School)與世界銀行旗下嘅國際金融公司(IFC)合辦一個公私營夥伴合作(Public-Private Partnerships, PPP)同項目投融資嘅高級研討班。

阿四:
我知道而家趨勢係愈來愈多基建項目用PPP,因為基建項目資金需求大,單靠政府有限資源去興建,通過基建促進經濟、改善社會民生就慢得多。私營機構參與既可大大增加資金來源,又能引入商業思維,有助減少大白象項目。

小森:
IFC聯合哈佛舉辦呢個課程已經有九年。今年同金管局合作,係因為IFC睇到IFFO過去一年推動發展基建融資平台嘅成績。IFFO亦希望透過課程提升業界對PPP和基建融資嘅認知同技能,所以一拍即合。

阿四:
呢個班讀乜?

小森:
五日嘅課程會用哈佛嘅教法,用大量案例做分析,引發深入討論。呢啲案例都係IFC有份參與嘅項目,好實用!

阿四:
我都想上呢個暑期班!

小森:
要有20年基建或相關範疇經驗嘅行政人員先夠資格。今次50位學生來自唔同國家,包括一帶一路沿線地區,當中有機構投資者、發展及政策銀行、基建項目營運商同發展商嘅高管、政府官員,仲有同IFFO工作相關嘅金管局同事,同埋IFFO嘅合作夥伴。

阿四:
難得大家嚟到金管局上堂,感受下香港基建融資平台嘅優點,又可以建立人脈網絡,對學員日後做基建融資工作應該好有幫助。

金管局會議室變身成為課室,舉行另類暑期班。
圖片說明:金管局會議室變身成為課室,舉行另類暑期班。

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2017年08月04日