- 阿四：
- 點解美國加息，香港息口無跟住一齊加？
- 小森：
- 你講緊邊種利率？息口只係籠統嘅稱呼，細分嘅話有香港銀行同業拆息（HIBOR）、存款利率、最優惠利率（Prime rate）等，每種利率走勢都由唔同因素帶動。
- 阿四：
- 近排樓市咁熱，我當然係講緊按揭利率啦。美國由2015年底開始加息幾次，噚日又加多一次，但睇返香港按揭利率無乜跟住加。
- 小森：
- 近年比較多業主揀用嘅「H按」，當中嘅H即係HIBOR，通常係一個月HIBOR利率。H無跟足美息一齊升，按息咪好似無乜點郁囉。
- 阿四：
- 乜唔係當美息高過港息時，就會引發資金流走，最終推高港息？
- 小森：
- 自從2008年環球金融危機後，差唔多有一千三百幾億美金流入咗香港。銀行水浸，短息就難升。不過，港美息差唔會無限擴闊嘅，息差越大就會誘發越多資金流走，最終港息都會有壓力要調高。
- 阿四：
- 既然資金未大舉流走，點解金管局仲要成日提醒大家小心美國利率正常化帶嚟嘅風險？
- 小森：
- 因為除咗港美息差會帶嚟資金流走壓力，其他因素例如環球嘅資金流向、投資者對香港資產嘅興趣等等，都一樣會有影響，所以好難準確預測港息最終會升幾多、升幾急。準業主做按揭時要諗清楚加息對自己供樓支出嘅影響，唔好低估加息嘅威力。舉例要供二十五年樓，每加一厘息嘅話，每個月供款就多超過一成，咪話唔襟計。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
