腦力編程馬拉松

小森：

啱啱個周末我去咗由一間本地銀行舉辦嘅金融科技腦力編程馬拉松（Hackathon）比賽，見識到本地同學喺金融科技方面原來都幾有創意喎。

阿四：

腦力…馬拉松？

小森：

Hackathon係科技界好流行嘅一種比賽，通常喺畀大學生組隊參加。今次比賽係首個透過金管局及數碼港嘅「腦力編程加速器」（Haccelerator）平台舉辦嘅活動，參賽者要喺24小時內度蹺解決問題，仲要將意念化成產品嘅雛型做示範，過程好緊張。

阿四：

今次Hackathon出乜題目畀參賽者？

小森：

主題係如何應用機器學習（Machine Learning）技術於銀行服務。比賽分兩個題目，一個要用機器學習去分析客戶行為，幫銀行更有效去銷售推廣，又或者偵測帳戶嘅可疑行為；另一個就係聊天機械人，用嚟同銀行客戶進行互動溝通。

阿四：

機器學習係乜東東嚟㗎？

小森：

你有冇聽過AlphaGo最近擊敗中國世界圍棋冠軍柯潔嘅新聞吖？AlphaGo就係應用咗機器學習技術啦！簡單講，機器學習係人工智能嘅一種，模擬人類嘅學習行為，憑經驗不斷改善自身嘅性能。

阿四：

嘩，聽落好似好勁。有幾多同學參加？佢哋嘅水準點呢？

小森：

總共有超過110位同學報名參加，分為14隊比賽。金管局金融科技促進辦公室（FFO）嘅同事有份擔任今次比賽嘅判評，聽佢講同學水準都幾高，參賽作品有創意得嚟，又唔會太離地。比賽最後有雙冠軍，其中一個作品係透過聊天機械人為客戶提供個人財富管理服務，另一個作品則透過機器學習演算法分析客戶數據，提供嶄新購物體驗。

阿四：

金管局好重視呢方面嘅人才培訓，FFO仲會唔會舉辦更多呢類比賽？

小森：

FFO今年推出嘅Haccelerator就係希望透過舉行比賽物色人才，今次Hackathon係頭炮，好快就會公布加速器比賽（Accelerator）。

阿四：

你下次再話我知乜嘢係Accelerator啦！

想問多啲有關金管局工作，歡迎電郵到小森、阿四專用郵箱：
88hkma@hkma.gov.hk



今次腦力編程馬拉松吸引過百個同學報名參加。

參賽者一收到題目，就要開始度蹺，然後通宵「揼code」。

捱完通宵後，仲要喺評判同其他參賽者面前介紹自己作品嘅意念，同埋展示產品嘅雛型。