- 阿四：
- 我去開嗰間美容院推出套票優惠，買得愈多折扣愈大，仲可以用信用卡分期付款，計落好着數！
- 精明大使：
- 着數還着數，你有冇諗過萬一美容院倒閉，你分期付款啲錢會點？
- 阿四：
- 我都冇得做埋剩返嘅療程，梗係唔使還啦！
- 精明大使：
- 梗唔係啦！用信用卡分期付款其實係你同發卡銀行借咗筆錢，先由銀行找晒筆數畀美容院，然後你再分期還錢畀銀行。所以就算優惠有幾吸引，喺簽分期付款合約前都要睇清楚啲條款，當中都提醒萬一商戶執笠，你都有責任繼續還款，唔好因為急住簽單而睇漏。
- 阿四：
- 如果我用信用卡簽賬直接一筆過畀錢美容院，係咪佢哋執笠時而我又未用完美容療程，就可以有信用卡退款保障？
- 精明大使：
- 基本上可以，但要睇下你張卡所屬信用卡組織嘅條款，包括退款保障嘅期限。如果好耐之前嘅簽帳，就可能申請唔到退款。
- 阿四：
- 原來唔係一定有得退返哂錢！我點樣知道我啲簽帳有無得申請退款？
- 精明大使：
- 係呀，所以你一筆過畀錢前，最好諗清楚自己係咪退款保障限期內用得晒所有療程。仲有畀錢後，記得保留返交易記錄如收據同商戶簽訂嘅合約，以備申請退款時遞交。想知多啲，睇下金管局同埋發卡銀行嘅網頁，或者直接問下銀行啦！
- 阿四：
- 如果我唔係分期付款，又唔係一筆過畀錢，只係同商戶簽約，每個月用信用卡自動轉帳畀錢，佢執笠時又點算？
- 精明大使：
- 商戶執笠後應該唔會繼續轉帳，但最好留意下一期信用卡月結單，如果發現有相關嘅帳項，你可以聯絡發卡銀行幫忙安排盡快退款。
- 阿四：
- 原來用信用卡過數都有咁多學問，今次真係長知識！
- 精明大使：
- 想知多啲使用信用卡貼士，可以瀏覽金管局網頁。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
