開戶交流會

小森阿四專欄

2017年04月28日

開戶交流會

阿四:
小森,早排你介紹我睇下金管局新開嘅「開戶難?」專頁,內容好實用,例如「銀行聯絡資訊」一欄就列出晒香港二十間零售銀行開戶嘅聯絡方法,慳返用家搵資料嘅時間!

小森:
金管局非常重視香港開戶困難嘅情況,仲特別成立咗一個專責小組去處理。佢哋嘅專用郵箱開通以嚟,都不時收到有關開戶嘅投訴或提問,小組同事都會逐一審視同跟進。

阿四:
除咗專頁同電郵外,金管局喺開戶困難方面仲做咗乜嘢跟進工作?

小森:
我哋同銀行、商會等各持份者就開戶問題嘅溝通一直無停過。好似上星期五咁,金管局就同投資推廣署合辦咗一場交流研討會,有二十一個商會、二十八間銀行嘅過百名代表出席,就開立、維持戶口進行直接而深入嘅交流。

阿四:
溝通真係會有幫助嗎?

小森:
當然有。其實開戶困難嘅問題,有時只不過係溝通出現誤會。我哋見到有啲銀行設立咗開戶專線,由受過訓練嘅員工負責解答返開戶疑問後,客戶體驗都改善咗。

阿四:
講起客戶體驗,我知道有啲海外公司要飛嚟香港幾次先開到戶口,佢哋就覺得唔係幾方便。

小森:
完全同意,我哋亦有同銀行反映呢個問題。有銀行就推出咗「預先審閱」程序,畀申請人可以透過電郵、傳真或郵寄有關開戶資料,銀行初步審閱過之後,先再安排面對面嘅會議,減少海外公司飛嚟香港嘅次數!

阿四:
聽講金管局同業界傾緊建立一個「認識你的客戶」資料庫,提升銀行盡職審查工作嘅效率。

小森:
係呀,客戶都同樣受惠㗎,以後開戶唔使再逐間銀行遞交文件,縮短開戶嘅流程。

阿四:
幾時會推出?

小森:
金管局已同主要銀行、技術供應商開過幾次會,大家都會就呢方面再多做功夫,有進一步消息就再通知大家。

金管局同投資推廣署合辦交流研討會,過百名銀行同商會代表出席,交流開立同維持戶口嘅議題

圖片說明:金管局同投資推廣署合辦交流研討會,過百名銀行同商會代表出席,交流開立同維持戶口嘅議題。

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2017年04月28日