- 阿四：
- 你放假去咗邊度玩？
- 小森：
- 星期六我去咗北區探我婆婆，順便教佢用視像櫃員機。
- 阿四：
- 點解要教佢用嘅？
- 小森：
- 你都知去銀行好多時都要排隊，佢老人家腳力唔好，企多陣會攰。其實視像櫃員機提供嘅服務都幾全面，啱佢用。
- 阿四：
- 你婆婆平時用唔用櫃員機？
- 小森：
- 少用。老人家始終對機器抗拒啲，而且佢鍾意同真人傾偈，好多時情願落返分行排隊。
- 阿四：
- 視像櫃員機有鏡頭畀銀行職員同客戶視像對話，客戶就算唔識用，職員都可以即時教佢。
- 小森：
- 好似我婆婆咁，上星期六想將港元定期存款續期，平時佢要行多幾步去分行處理。今次我教佢用樓下新裝嘅視像櫃員機，佢只需要插入銀行咭，然後按銀行職員指示將身份證放去掃瞄器，再喺輕觸式螢幕上面簽名，銀行職員核對到佢嘅身份後，好快幫佢辦理手續，密碼都唔使撳。婆婆仲順便問埋人民幣定存嘅息口㖭！佢用完猛咁讚個職員嘅態度。
- 阿四：
- 我知道部分銀行嘅視像櫃員機係二十四小時運作，而有啲銀行就派職員喺視像櫃員機隔離，即場教客戶點用。全香港有幾多部視像櫃員機？
- 小森：
- 現時有五間銀行提供超過二百部機，比一年前多咗一倍幾。全港自動櫃員機都超過三千三百部，比十年前增加咗四成咁多。
- 阿四：
- 有啲人覺得香港嘅銀行覆蓋不足，其實隨住科技發展，網上銀行、手機應用程式、視像櫃員機都處理到銀行嘅基本服務，市民未必經常要去分行㗎。其實大約只有三成嘅金融交易仲係經銀行櫃位處理㗎咋。
- 小森：
- 金管局陳總成日講普及金融，意思就係市民大眾，包括偏遠地區嘅居民、老人家，或者唔慣用電腦嘅基層市民，都可以獲得基本嘅銀行服務。普及金融點幫到市民，我哋下次再講多啲。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
