- 阿四：
- 聽講呢排多咗人專程上嚟金管局資訊中心，要買我哋上星期喺度講過含有十三萬八千蚊嘅紙鎮呀！
- 小森：
- 估唔到我哋都有啲叫座力喎。講開又講，我近日又無意中發現咗公司有條神秘管道呀！
- 阿四：
- 喺邊度？有乜用？
- 小森：
- 呢條管道貫穿兩層樓，但唔係畀人行，而係用嚟傳送一啲金融交易結算嘅文件。
- 阿四：
- 嗄，仲咁落後？今時今日乜都電子化啦，傳送文件用內部電腦撳個掣咪搞掂囉。
- 小森：
- 當然我哋絕大部分都用電子網絡搞掂，但有啲要有正式實物文本做依據，仲要喺短時間經多個相關同事簽名核實。咪睇佢傳統，呢個方法其實非常可靠㗎。比起「人肉」速遞，跑上跑落好得多！
- 阿四：
- 仲肯定可以免遭黑客入侵㖭！
- 小森：
- 黑客？冇咁易。金管局做足網絡安全，但亦不時舉行演習。好似早排有個禮拜六我哋就模擬萬一金管局IT系統癱瘓，無法支援寫字樓各部門嘅運作，同事仍要確保喺呢種極端情況下，金管局嘅關鍵功能可以持續運作，包括金融交易嘅交收結算。
- 阿四：
- 無電腦用，咁咪要飛紙仔？
- 小森：
- 效率當然受影響，但最重要係我哋透過呢啲演習，確保金管局面對突發事件時，都可以維持主要功能唔會停頓，否則會影響香港嘅金融市場。
- 阿四：
- 講返條神秘管道，其實點用？
- 小森：
- 同事將文件捲入去特定膠筒，再放入神秘管道（見圖），一撳制，管道變成真空狀態，膠筒就會好似子彈咁飛上或飛落去目的地，既安全，又快捷。
- 阿四：
- 咁咪好嘈囉？
- 小森：
- 少少㗎，所以管道四周要鋪隔音棉。
- 阿四：
- 其實講咗咁耐，究竟神秘管道喺邊兩層樓？
- 小森：
- 唔話你知。
- 阿四：
- 點解喎？
- 小森：
- 咁先夠神秘！
只要將文件捲入特定膠筒（紅箭嘴示），放入神秘管道，膠筒就如子彈般飛彈到目的地。
想問多啲有關金管局工作嘅題目，歡迎電郵到小森、阿四專用郵箱：88hkma@hkma.gov.hk
