- 小森：
- 你早幾日問我借相機，有乜好嘢影呀？
- 阿四：
- 我同陳總裁、金管局金融科技促進辦公室同事喺星期二（六月五日）去咗深圳，同深圳市副市長艾學峰、深圳金融辦主任何曉軍，以及「深港金融科技創新獎」比賽嘅得獎機構代表聚首一堂，當然要影低呢個重要時刻啦。
- 小森：
- 不單只見面一刻重要，呢個比賽實在意義重大，係金管局第一次同金融辦聯手搞金融科技（fintech）比賽。金管局同深圳金融辦希望藉住呢個比賽，可以進一步加強港深兩地喺fintech嘅交流同合作，推出更多優質嘅跨境金融產品同服務畀用戶，幫助推動粵港澳大灣區嘅融合，方便市民生活同營商活動。
- 阿四：
- 無錯，所以今屆賽事特登加入「金融創新獎（深港組）」，專畀港深跨境金融產品同服務項目參加嘅，今次六個得獎項目分別由港深企業平分秋色。比賽另設有「金融科技專項獎」，用嚟表揚區塊鏈、人工智能、大數據等嘅項目，香港企業都有份獲獎㗎，證明我哋喺金融科技嘅實力唔弱㗎。
- 小森：
- 相你就影完嘞，幾時還返相機畀我？
- 阿四：
- 未得住，因為港深兩地好快又有交流活動嘞！金管局舉辦嘅「金融科技人才培育計劃2.0」將喺6月推出「深圳暑期實習計劃」，到時會有大約50名香港高等院校學生，分別去深圳8家知名金融科技或科技金融公司實習6星期，我影埋先畀返相機你啦。
圖片說明：金管局總裁陳德霖（前左二）聚精會神聽取「深港金融科技新獎」得獎機構介紹其fintech產品
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
