- 小森：
- 阿四，金管局義工隊下星期有公益活動，你會參加嗎？
- 阿四：
- 平時返工已經咁辛苦，仲邊有時間做義工！
- 小森：
- 視乎你點樣管理時間啫。金管局義工隊2017年就喺公餘時間參與咗485小時嘅社會服務。由2001年義工隊成立開始計，參與慈善活動時數近4,000個鐘㖭。金管局已經連續兩年攞咗由香港社會服務聯會頒發嘅「10年Plus同心展關懷標誌」。
- 阿四：
- 我知道義工隊不時邀請同事參與各種活動，好似步行籌款、探訪老人、賣旗等。義工隊早排參加長者安居協會嘅「Running Oi Man」籌款活動，喺短短100分鐘內完成廿幾項任務，攞咗比賽銀獎。
- 小森：
- 其實義工隊都會自己舉辦社會服務嘅活動㗎！例如曾經邀請香港扶幼會則仁中心嘅小朋友嚟參觀金管局資訊中心，玩下集體遊戲。平時呢班小朋友出街唔容易，因為需要一個導師睇住兩個小朋友，個次有義工隊幫手，佢哋參觀完金管局仲一齊去山頂玩㖭。
- 阿四：
- 雖然我比較少參加義工隊活動，但每次佢哋幫慈善團體籌款，我都有盡下綿力㗎。
- 小森：
- 我聽義工隊嘅中堅分子Pan講，唔好自以為做義工係幫人。試過一次探訪獨居長者，原意係等佢哋無咁悶，點知有位八十幾歲伯伯自彈自唱，娛樂返一班義工㖭！
圖片說明：金管局義工隊以西遊記造型參加「Running Oi Man」，甚得長者歡心！
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
