- 阿四：
- 講開金管局成立廿五周年，點可以唔提外匯基金。我聽陳總裁成日講，外匯基金一直都係香港金融同銀行嘅強大後盾，究竟具體做過乜？
- 小森：
- 咁就要幫你溫故知新啦。其實擠提、銀行倒閉等事件係香港歷史並不罕見，上世紀50至90年代就不時發生。例如80年代香港社會對前途問題好大焦慮，銀行出現過倒閉潮、擠提潮，外匯基金先後動用過90億元去拯救銀行，維持銀行體系。九七年爆發亞洲金融危機時，亦係由外匯基金向被擠提嘅銀行提供280億元債務擔保，穩住市民對銀行體系嘅信心。
- 阿四：
- 銀行存款係市民嘅血汗錢，當然要好好保障。我知道二○○八年全球金融危機人心惶惶，外匯基金就出面為香港嘅所有銀行存款提供百分百擔保，市民當時即刻放心晒。香港金融體系能夠安然渡過呢場危機，呢個擔保都發揮咗穩定人心嘅作用。當時整個銀行體系存款有6萬億，如果唔係有豐厚儲備，都好難做到。
- 小森：
- 除咗為市民存款做後盾，仲有香港嘅金融市場㗎。例如八七股災時，港股停市四日後，政府就透過外匯基金提供10億元畀期貨交易所做備用貸款，以防香港期貨市場爆煲。一九九八年「打大鱷」時動用咗大約1,200億入市，大家應該記憶猷新吧。
- 阿四：
- 政府將財政盈餘放喺外匯基金收取投資收入。每年畀幾多？
- 小森：
- 外匯基金會按「投資組合」過去六年平均回報率，計返派幾多利息畀政府，而且保證回報唔低過零，可謂有賺無蝕。過去十年派畀政府嘅息近3,800億元（見圖）。另外，外匯基金亦有幫手管理其他政府基金（如關愛基金、語文基金等）同埋來自法定組織（如房屋委員會、醫管局等）嘅存款，近十年派息加埋近700億元㗎！由於外匯基金肩負穩定貨幣、銀行及金融體系嘅責任，所以好大部分嘅投資都放喺低風險、高流動性嘅資產類別。雖然如此，我哋都做到長期增長，自成立以嚟，外匯基金嘅平均年度回報係4.9%，高於香港同期通脹嘅2.1%。
- 阿四：
- 原來孭咁重飛，真係唔好當佢一般投資基金咁睇。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
