打到嚟?

小森阿四專欄

2018年04月20日

打到嚟?


阿四:
近排睇新聞講金管局已經多次「接錢」,其實點解?

小森:
金管局「接錢」係聯匯制度設計嘅一部分。所謂「接錢」,即係金管局會透過銀行喺外匯市場買港元、沽美元,保證港元匯率不會弱於7.85的弱方兌換保證。當資金逐步流出,銀行體系結餘會逐步減少,港息會慢慢上升,利率正常化其實係好事,亦係金管局樂見嘅!

阿四:
但啲人話港匯跌到33年以來新低,會唔會再跌落去架?

小森:
唔會。根據聯匯機制,金管局會「包底」買入港元,保證港匯唔會跌穿7.85呢個位。香港係國際金融中心,大量資金經常進出,你可以當金管局係「超級找換店」,喺強方或弱方兌換保證被觸發時,會買美元或買港元,維持港元匯價喺7.75-7.85,所以觸及任何一邊都係好正常嘅運作。

阿四:
咁大鱷幾時會打到嚟?

小森:
今次港匯轉弱並唔係有大鱷狙擊,只係來自息差套戥,因為港美息差有成一厘,吸引資金在市場沽港元、買美元去賺息差。陳總裁成日都話香港銀行體系穩定係重中之重,銀行和金融體系的抗震能力比1997年已經大幅提高,加上外匯基金有成超過4萬億港元的資產,銀行體系流動性又極之充足,咁多彈藥,梗係冇有怕啦!

阿四:
咁又係,香港喺2008年全球金融危機同2011年歐債危機都安然度過,就知我哋根基唔錯啦!

 



想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2018年04月20日