舊鈔去哪兒?

小森阿四專欄

2018年02月09日

舊鈔去哪兒?

 

阿四:
小森,舊年你同我講用新鈔封利是唔夠環保,我今年聽話改用迎新鈔。

 

小森:
係㗎,三間發鈔銀行每年農曆新年前都額外印新鈔,過程中既要用棉花、又要用油墨,仲未計要調配人手確保市民換鈔過程順暢,同埋運送鈔票到分行!單係運鈔嘅流量,聽講就比平日多兩成。其實不論新鈔舊鈔,封得利是就係好鈔。迎新鈔佔總出鈔量比例由2006年20%增加到近年約45%,反映市民都好支持。

 

阿四:
講開又講,發鈔銀行會篩選一啲用過但仍然新淨嘅銀紙嚟做「迎新鈔」,咁用到殘殘舊舊嘅銀紙,又會去咗邊呢?

 

小森:
其實三間發鈔銀行每日都要同回流返金庫嘅銀紙做body check(體檢)㗎。佢哋會用大型清分機檢查自家發行嘅舊鈔,仲係咪適合繼續流通使用。清分機自動篩出殘舊嘅銀紙後,就會即時碾碎,然後拎去銷毀。清分機一分鐘可以處理成千張銀紙,一日八個鐘頭就可以清分到五十萬張銀紙,真係好有效率㗎!

 

阿四:
舊鈔有幾舊先會被淘汰?

 

小森:
一般嚟講,銀紙有崩、有爛、劃花咗、防偽特徵無咗、霉霉爛爛等,就無得留低㗎嘞。

 

阿四:
霉霉爛爛都分得出?

 

小森:
清分機透過檢查銀紙嘅濕度,就知道有幾霉。新淨銀紙乾身,用手指彈會有清脆嘅聲音;相反,如果張銀紙濕氣重,彈唔響,就係殘鈔嚟啦。

 

阿四:
唔怪得香港嘅銀紙一般都乾淨企理,背後原來做咗咁多功夫。

圖片說明:發鈔銀行每日都會用清分機幫銀紙做body check
圖片說明:發鈔銀行每日都會用清分機幫銀紙做body check

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年02月09日