股票掛鈎產品

小森阿四專欄

2018年01月19日

股票掛鈎產品


阿四:
小森,呢排股市升得咁急,你話股票掛鈎產品,好似股票掛鈎票據(Equity-linked Note)同股票掛鈎存款(Equity-linked Deposit)買唔買得過呢?

小森:
股票掛鈎產品係結構性投資產品,投資條款比較複雜,我擔心你唔知自己買咗乜咋喎。

阿四:
唔使擔心喎,我已經睇晒喺銀行攞嘅產品銷售單張。嗱,如果我買10萬蚊某大藍籌嘅ELN,假設當時呢隻股票嘅股價係100蚊,行使價係90蚊。如果喺ELN埋單個日,股票收市價高過行使價90蚊,我就收取本金10萬蚊再加由銀行派發嘅回報;相反,如收市價低過行使價嘅話,我就用90蚊買入10萬蚊等值嘅股份。斷估大藍籌股價短期內應該唔會跌超過一成啩,贏面好似好大!

小森:
阿四,近嚟嘅升市好似令你忘記咗幾次金融危機嘅教訓咁喎。大圍市況波動起嚟,邊個保證藍籌股價唔會大幅波動㗎?

阿四:
唓,真係咁唔好彩嘅話,我都係接股票啫,咪當趁低吸納、長線投資囉!輸極有個譜。

小森:
咁你就低估咗掛鈎產品嘅風險喇!如果ELN埋單個日,股價跌到50蚊,你都要被逼用90蚊「高價」接貨,即刻「坐艇」,點會係趁「低」吸納呀!仲有,即使掛鈎股票嘅市價高過行使價,你嘅投資回報亦可能只限於ELN預設嘅上限;相反喺最壞情況下,你可能會蝕晒全部本金,例如ELN發行商或者嗰間上市公司執笠,隨時係連投資本金都收唔返。你有冇心理準備承受本金變零嘅風險呢?你預期收到嘅回報,係咪抵銷到咁大損失嘅風險?

阿四:
即係有機會贏得少、輸得多。睇嚟我都係做多啲功課,諗清楚先至決定喇。



想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2018年01月19日