- 小森:
- 上一篇講到金管局可以同銀行無上限同自由咁以固定匯率兌換美元/港元,點解可以咁有把握?
- 阿四:
- 好簡單,因為每當有資金流入香港時,金管局就會將收到嘅美金,放入外匯基金嘅「支持組合」去管理,絕對唔會洗咗佢㗎。
- 小森:
- 原來「支持組合」就係「支持」港元穩定,咁呢個組合持有乜資產㗎?
- 阿四:
- 都係一啲高流動性同信貸質素良好嘅美元資產,例如美國國庫券。萬一市場上對港元需求轉弱,減持港元兌換美金時,外匯基金可以隨時將呢啲美元資產變返現金,應付市場兌換美金嘅需求。
- 小森:
- 我記得,上次你話金管局好似一間年中無休嘅超級兌換店,隨時有人拍門換錢,都要即刻以固定匯價兌換。我都想去金管局換啲美金喎!
- 阿四:
- 只係換畀銀行㗎咋。你要換就去返銀行啦。
- 小森:
- 其實行聯繫匯率對香港有乜好處?
- 阿四:
- 香港係一個細小而極度開放嘅經濟體,好易受外圍因素影響,就好似未實施聯匯制度前,港紙大幅貶值,直接影響民生同埋金融系統嘅穩定。而且,現時環球貿易同金融交易主要係用美元定價同結算,而香港股票等金融資產雖然係用港元計價,但因為同美元掛鈎,減少咗投資者嘅外匯兌換同風險管理成本。呢個係香港金融市場持續發展嘅重要因素,亦有助鞏固香港作為國際商貿同金融中心嘅地位。國際貨幣基金組織多年嚟都支持聯匯制度,認為有關制度仍然最適合香港,同埋係維持香港穩定嘅基石。
想問多啲有關金管局工作,歡迎電郵到小森、阿四專用郵箱:
88hkma@hkma.gov.hk