借稅貸前睇一睇

小森阿四專欄

2017年12月15日

借稅貸前睇一睇


阿四:
小森,好快又要交稅,好多間銀行都推出稅貸,有啲仲話低過一厘,好似好so喎!

小森:
稅貸係私人貸款嘅一種,還得到先好借,唔係淨睇息率高低。

阿四:
借稅貸有咩地方要特別注意?

小森:
好似你咁講,稅貸息率睇落都好低,但唔係每個客都可享低息,銀行批出低息稅貸時會考慮好多因素,例如貸款額係幾多、借款人係咪新客戶、有冇同時申請信用卡、有冇喺銀行開咗出糧戶口,或者借款人係咪專業人士等,所以未必好似廣告所講咁低息。 

阿四:
貸款息率好複雜,一時又話每月平息,一時又話實際年利率,究竟睇邊個先啱?

小森:
確係唔易睇,因為有啲貸款平息息率低,但另外收取較高手續費,仲會喺貸款額扣除,所以識睇梗係睇已經包括手續費嘅實際年利率(APR)。除手續費外,如有現金回贈/優惠(例如利息回贈及利率削減),銀行亦可以同時計埋入APR裡面,但就唔應該包括例如超市、其他商舖現金贈券等呢類實物利益。

阿四:
如果計埋現金回贈/優惠,咁個APR咪會變低咗?

小森:
係呀,但現金回贈/優惠並非必須計算喺APR內。若個別銀行將現金回贈/優惠計算在APR內,應同時提供有關回贈/優惠不適用時嘅APR,畀客戶準確咁比較返。每間銀行推出零售貸款產品都要提供APR準確咁反映實際借貸成本,等客戶參考同比較唔同銀行嘅貸款計劃,選擇最適合自己嘅貸款。

阿四:
呢排股市咁熱,借稅貸炒股票咪好好搵。

小森:
萬一買咗嘅股票一時變現唔到就壓住貸款,仲有冇足夠能力每個月還款?而且投資唔係必賺㗎,萬一股價不似預期,蝕咗稅貸本金,仲要畀貸款利息㖭!



想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年12月15日