- 阿四：
- 小森，有讀者問我哋，點先可以投身做銀行網絡安全嘅工作呀？
- 小森：
- 金融業愈來愈重視網絡安全，呢方面嘅人才全世界都爭住請！做得網絡安全，除咗一般會要求從業員有資訊科技相關嘅學位或工作經驗外，好多僱主仲會睇下係咪有國際級嘅網絡安全專業認證。
- 阿四：
- 我知道，香港普遍都接受其他公認嘅國際資歷認證。金管局舊年推出網絡防衛計劃，其中一個重點係培訓更多網絡安全嘅香港專才，於是聯同香港銀行學會、應科院推出本地化嘅網絡安全專業認證「CCASP」。考試唔止係筆試，部分仲要喺電腦度模擬網絡受黑客攻擊情況，考驗考生嘅臨場應對能力，聽講要求都唔低㗎。所以銀行學會有提供課程，畀考生做好準備。
- 小森：
- 除咗CCASP，我知道銀行學會明年會喺銀行專業資歷架構下，推出一個新嘅網絡安全培訓課程及專業認證項目，畀銀行業嘅網絡安全從業員由淺入深咁去學習。
- 阿四：
- 呢行咁火熱，我真係好有興趣。但我唔係讀IT出身，仲有無計？
- 小森：
- 其實，唔少大學都有舉辦金融科技短期課程，畀修讀任何科目嘅大學生深造。話說回來，金融科技涉及金融、科技、法律、工程等唔同領域，呢啲科目嘅畢業生可能會佔優，但聽講唔少金融科技公司請人時，唔一定只睇「沙紙」，仲會睇下應徵者夠唔夠創意。
- 阿四：
- 目前為此，香港已經有兩家本地大學開辦咗金融科技學位㖭。
- 小森：
- 仲有金管局舉辦嘅金融科技人才培育計劃（FCAS），為大學生提供銀行實習職位，等佢哋有實戰經驗，為將來入行熱身。下年年初再開始報名，記得留意啦！
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
