縮表係乜?

小森阿四專欄

2017年09月22日

縮表係乜?

阿四:
噚日美國聯儲局宣布十月啟動「縮表」。其實乜嘢係縮表?

小森:
係縮聯儲局嘅資產負債表。好多央行都係「無中生有」咁創造貨幣,即係俗稱「印銀紙」。錢多咗,央行嘅資產負債表就會增大。2008年金融危機,事後美國採取量化寬鬆貨幣政策刺激經濟,就係聯儲局印咗好多銀紙,買入大量美國國庫債券同按揭抵押證券 (MBS) ,令到資產負債表由約八千億美元膨漲到而家差不多四萬五千億美元,向市場注入大量流動資金。債券到期後,就將收返嘅本金再買債。呢種非常手段扭曲咗環球金融市場嘅平衡,引致唔少不良後果,美國近年經濟轉好,係時候正常化,縮表係方法之一。

阿四:
資產負債表可以點縮?

小森:
就係當儲聯局手上債券到期後,唔再續期,收返本金並同時註銷等額嘅貨幣,於是資產負債表就縮細。對市場來説,效果等同將資金由市場抽走。

阿四:
過去幾年,全世界資產價格係咁升,多少都係由於多國央行大印銀紙去支撐。美國縮表,仲話加息㖭,咁啲資金咪會由海外市場流返去美國,錢少咗,各地資產價格咪會調整?咁咪香港都會有影響囉!

小森:
係有機會㗎,但你都知環球政治、經濟形勢咁複雜,加上美國縮表又係史無前例。究竟美國貨幣政策正常化後,全球資產價格會幾快調整、調整幾多、幾耐、點樣調整,都好多未知之數。

阿四:
所以大家都係審慎管理風險為上啦!

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2017年09月22日