- 阿四：
- 早幾日我同母校啲師弟師妹傾偈，發現佢哋以為喺銀行返工只係坐櫃位、做sales跑數，未必啱自己性格；有啲又以為只有讀商科先可以入行，似乎對從事銀行工作有唔少誤解。
- 小森：
- 佢哋可能唔知道，銀行職位好似踢足球咁，分為前鋒、中場同後衛。平日我哋比較多接觸係前線嘅銀行職員，主要負責面向客戶、銷售同交易、業務拓展等。至於中場嘅員工就係支援前線職員、負責風險管理同合規(Compliance)工作等。
- 阿四：
- 後勤職員嘅工種同銀行業關係無咁大，例如資訊科技、人事部、財務部等，呢啲職位喺其他公司都會有。仲有新興嘅金融科技，更加無分「前中後」，最緊要員工有「橋」。
- 小森：
- 近年有兩大工種喺銀行界好吃香，就係合規同金融科技。前者係為銀行把關，確保營運符合各種監管嘅要求，後者就唔使多解釋啦。
- 阿四：
- 金融業係香港經濟一大產業，佔GDP大約18%。全港有25萬人從事金融業，當中銀行佔超過10萬人。銀行本身都分好多種，除咗最常見到嘅零售銀行，仲有專做企業客戶嘅商業銀行、投資銀行，或者針對高資產客戶嘅私人銀行等。
- 小森：
- 所以銀行點止得銷售工作咁單一！
- 阿四：
- 而且銀行業行頭大、工種多，可以有機會作唔同嘗試！
銀行工種分類
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
