- 小森：
- 債券通開通個日場面好墟冚，打鑼打鼓，你有冇睇到？
- 阿四：
- 我有睇新聞。不過散戶又無份參與債券通買賣，好似同我哋啲小市民無乜關係咁。
- 小森：
- 點會無關？債券通用香港做連接各地投資者進入內地債券市場嘅樞紐，就好似滬港通、深港通咁，再次顯示香港協助內地金融市場開放嘅獨特作用。
- 阿四：
- 有幾獨特呀？
- 小森：
- 內地債市喺現有制度下，只限個別國際機構投資者直接開戶參與。債券通突破之處就係將內地同香港嘅金融基礎設施互聯互通，畀海外機構投資者沿用國際買賣債券嘅結算託管習慣，而內地債券交易機制又唔使作出重大改變，真正做到一站通。
- 阿四：
- 聽落好似好簡單！
- 小森：
- 呢個先係最考功夫嘅地方，睇到香港作為金融中介嘅價值。況且內地債市全球第三大，規模達六十七萬億人民幣，而家境外投資者不足2%，你話潛力幾大呢！
- 阿四：
- 債券通仲可以為香港帶嚟乜好處？
- 小森：
- 債券通方便咗海外投資者，再加上人民幣愈嚟愈國際化，相信日後吸引到更多資金利用香港呢個平台買賣內地債券，對跨境結算、託管、資產管理、風險管理等金融服務需求都會大大增加。呢啲高增值嘅職位都可以為香港經濟增長帶來實質貢獻。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
