13.8萬元嘅新春大禮

小森阿四專欄

2017年02月03日

13.8萬元嘅新春大禮

小森:
阿四,恭喜發財!見你四萬咁口,係咪今年逗咗好多利是?

 

阿四:
無錯,金管局舊年發咗13個儲值支付工具(SVF)牌照,市民日常方便咗,仲增加咗派利是嘅渠道。過年前啲SVF都推出電子利是,連銀行都玩埋一份,我今年就收咗唔少,節省咗拆利是封同存錢入戶口嘅時間。

 

小森:
係呀,今年多咗新奇方法收利是、搶利是,雖然都係細細封,但過程熱鬧好玩,同派傳統嘅利是一樣咁好氣氛。

 

阿四:
講起傳統利是,金管局2006年開始鼓勵市民用「迎新鈔」(仍然新淨的鈔票)封利是,迎新鈔兌換比例由當年20%,升到近年50%左右,睇到市民環保意識係有提高到。係喎,小森,我封利是呢?

 

小森:
我未結婚未有資格派利是,但見阿四你平時咁辛苦,送份「厚禮」獎你啦,內含13.8萬港幣㗎!

 

阿四:
嘩!咁大份禮我恐怕唔收得。

 

小森:
唔使擔心,我送嘅係金管局資訊中心售賣嘅紙鎮(見圖)!一個紙鎮要用138張碎鈔先做到,千元紙鎮就價值13.8萬啦,但每個只係賣100蚊。

 

阿四:
原來印鈔廠有咁多碎鈔㗎?

 

小森:
其實唔多㗎,呢啲碎鈔都係印刷出時未能通過嚴格測試而唔發行嘅鈔票,要儲一段時間先夠做紙鎮,「金牛」數量尤其少,所以千元紙鎮經常缺貨。

 

阿四:
話時話,點解我哋會喺度寫專欄?

 

小森:
金管局官方網站不時會發表《匯思》文章同大家講下最新動向,但你都知啦,陳總一係唔寫,一落筆就洋洋數千字,雖然「精闢」,但好多人未必有時間睇,難免令人覺得有啲離地。

 

阿四:
陳總昂藏六呎,又真係離地…面好遠嘅!

 

(金管局總裁陳德霖這時行出來)

陳總:
小森、阿四,我好似聽到你哋講我喎。

 

小森:
我哋講緊點樣寫好專欄,畀大家更了解金管局嘅工作,例如講下金管局鮮為人知嘅趣聞、典故。

 

阿四:
如果有你參與就更好啦!

 

陳總:
無問題,等我間中醒啲料畀你。仲有,如果讀者有問題或者意見你哋唔識回應,可以轉交畀我。不過只限於金管局嘅問題,私人問題就……

 

小森:
「一向都唔回應,今次亦唔例外。」知㗎啦。

 

阿四:
陳總咪走住,我哋封利是未畀喎……

趁今日係人日,陳總暨金管局同仁祝大家新春大吉、生日快樂!

 

小森、阿四專用電郵:88hkma@hkma.gov.hk

金管局資訊中心的千元紙鎮用138張「金牛」(等值13.8萬元)碎鈔製成,每個只售100大元!

管局資訊中心的千元紙鎮用138張「金牛」(等值13.8萬元)碎鈔製成,每個只售100大元!

 

註:關於金管局資訊中心出售的碎鈔紙鎮有新發展,詳情請參考https://www.hkma.gov.hk/chi/news-and-media/press-releases/2023/10/20231020-4/

最新小森阿四專欄
修訂日期 : 2023年10月20日